Герман улсын Олон улсын дээд боловсролын магадлан итгэмжлэлийн байгууллага "ASIIN" нь Монгол улсын инженерийн чиглэлийн дээд боловсрол олгож байгаа хөтөлбөрүүдээс анх удаа ШУТИС-ийн ЭХИС-ийн “ЦАХИЛГААН ХАНГАМЖ” мэргэжлээр бакалавр, магистр зэрэгтэй мэргэжилтэн бэлтгэх хөтөлбөрүүдийг магадлан итгэмжлэхээр ASIIN-аас сонгогдсон 5 доктор, профессор шинжээчдээс бүрдсэн магадлан итгэмжлэх баг 2013 оны 9 сарын 17-ны өдрөөс 9 сарын 20-ны өдөр хүртэлх хугацаанд ШУТИС-д ажиллалаа. Шинжээчид ШУТИС-ийн ректор Б.Очирбат болон проректорууд, ЭХИС-ийн захирал Ч.Мангалжалав, ШУТИС ба ЭХИС-ийн бусад удирдлагууд, хөтөлбөр хэрэгжүүлэгч Цахилгаан Хангамж, Өндөр Хүчдлийн профессорын багийн тэргүүлэх профессор Б.Сэргэлэн,  тус профессорын багийн болон бусад багш нартай уулзаж, олон улсын дээд боловсролын магадлан итгэмжлэлийн байгууллага болох ASIIN-ы үндсэн шаардлагуудын дагуу уг хөтөлбөрүүдийн сургалтын үйл ажиллагааны талаар зарим зүйлийг асууж тодруулав.

ЭХИС-д “Цахилгаан хангамж” мэргэжлээр бакалавр, магистр зэрэгтэй мэргэжилтэн бэлтгэх хөтөлбөрүүдийн сургалтыг хэрэгжүүлж буй багш, профессорууд, сургалтын албаны ажилтнууд болон суралцаж байгаа оюутан залуучуудтай биечлэн уулзаж, сургалтын бүхий л үйл ажиллагаатай нарийвчлан танилцаж, сургалтын орчин, анги танхим, номын сан, эрдэм шинжилгээ, сургалтын зориулалттай лабораторуудыг үзэж сонирхов.

ШУТИС-д ажиллаж, сургалтын үйл ажиллагаатай бүрэн танилцаж судалсныхаа дараа шинжээчдийн багийн гишүүд “Цахилгаан хангамж” мэргэжлээр бакалавр, магистр зэрэгтэй мэргэжилтэн бэлтгэх хөтөлбөрүүдийг хэрэгжүүлж буй хамт олны хөдөлмөр, ажлын үр дүнг өндрөөр үнэлж, зохион байгуулалтын өндөр түвшинд шинжээчдийн багийн ажиллах нөхцлийг бүрдүүлж өгснийг онцлон тэмдэглээд, зарим зүйлүүд шинжээчдийн бодож, төсөөлсөнөөс ч илүү байгааг сайшааж байв. Шинжээчдийн урьдчилсан дүгнэлтээр амжилттай дүн үзүүлсэнд сэтгэл хангалуун байгаагаа илэрхийллээ.

ASIIN-ы магадлан итгэмжлэх дотоод журмын дагуу шинжээчдийн дүгнэлтийг 2013 оны 10 дугаар сард багтаан ШУТИС-ийн ЭХИС-д танилцуулсаны дараа магадлан итгэмжлэл олгох комиссын хуралдаанаар хэлэлцүүлээд эцсийн шийдвэрийг 2013 оны 12 дугаар сард багтаан ирүүлэх төлөвлөгөөтэй байгаа тухайгаа хэлээд 9 сарын 20-ны өдөр нутгийн зүг хүлгийн жолоогоо заллаа.